ЕТТБ Москва ва Минскдаги ваколатхоналарини ёпмоқда
Европа тикланиш ва тараққиёт банки Москва ва Минск шаҳарларидаги ўз ваколатхоналарини ёпмоқчи.
Банкнинг расмий сайтида бу қадам Россия ва Беларуснинг Украинадаги хатти-ҳаракатларининг муқаррар натижаси бўлгани урғуланган.
“Биз Украинани дастаклашда собит эканимизни билдирамиз ҳамда Украина ва урушдан жабр кўрган бошқа давлатлар учун икки миллиард евро миқдоридаги дастлабки ёрдам пакетини мувофиқлаштириб бўлдик”, дейилган банк хабарномасида.
Аввалроқ Озодлик ЕТТБ Ўзбекистондаги тўртта тижорат банкига 210 миллион АҚШ доллари миқдорида кредит ажратгани ҳақида хабар қилган. Мазкур қарз, халқаро молия институти қайдича, ўзбекистонлик экспортчилар ва импортчиларга Украинадаги уруш ҳамда унинг Россия ва Марказий Осиё иқтисодиётига таъсири туфайли савдо-сотиқда юзага келаётган узилишлар билан боғлиқ муаммоларни ҳал қилишда ёрдам беради.
G7 давлатлари Россияга газ ҳақини рублда тўлашдан бош тортишмоқда
“Катта еттилик”ка кирадиган мамлакатлар Россия гази учун рублда ҳақ тўлашдан бош тортишди.
“G7 нинг барча вазирлари бу шартнома шартларининг бир томонлама очиқдан-очиқ бузилиши бўлгани ҳақида ягона фикрдалар. Рублда ҳақ тўлаш талабини қабул қилиб бўлмайди, биз манфаатдор ширкатларни Путиннинг талабини бажармасликка чақирамиз”, деган Германия иқтисодиёт вазири Роберт Хабек.
Аввалроқ Россия президенти Владимир Путин ҳукуматга, Марказий банкка ва “Газпром”га 31 мартгача газга ҳақ унидиришнинг янги тартибини белгилаш ва Кремль томонидан “дўст бўлмаган давлатлар” сифатида эълон қилинганлардан газ учун ҳақни рублда талаб қилиш хусусида топшириқ берган эди.
Россия президентининг матбуот котиби Дмитрий Песков 28 март куни Ғарб мамлакатлари газ ҳақини рублда тўлашдан бош тортган тақдирда, Россия газни “бепул” етказиб беришдан бош тортишини қайд этган.
Путин ҳукуматга 31 мартгача Европа Иттифоқидан газ учун рублда ҳақ тўлашни талаб қилишни топширди
Россия президенти Владимир Путин ҳукуматга, Марказий банкка ва “Газпром”га 31 мартгача газга ҳақ унидиришнинг янги тартибини белгилаш ва Кремль томонидан “дўст бўлмаган давлатлар” сифатида эълон қилинганлардан газ учун ҳақни рублда талаб қилиш кўрсатмасини берди. Бу тўғрида Кремль расмий сайти маълум қилди.
Хабарда таъкидланишича, ҳукумат, Россия банки ва “Газпром” “газ учун тўланадиган ҳақ валютасини ўзгартириш” масаласида қатор чора-тадбирларни ишлаб чиқиши лозим ва бу ҳақда ойда бир марта Путинга ҳисобот берадилар.
Ғарб давлатлари ҳозирча газ учун рублда ҳақ тўлашга тайёр эмаслигини билдирмоқда. Франция президенти Эммануэль Макрон, жумладан, амалдаги шартномаларда ҳақ евро ва долларда тўланиши қайд этилганини, рубль ҳақида гап йўқлигини айтди.
Словения бош вазири Янез Янша Путиннинг бу кўрсатмасига нисбатан яна-да кескинроқ фикр билдирди ҳамда “Европада рубль қандай кўринишда эканини ҳам ҳеч ким билмайди”, деб айтди.
Россия гази ва нефтидан бош тортиш чақириқлари кучайиб бораётганига қарамай, Европа Иттифоқидаги қатор давлатлар, жумладан, Германия айни пайтда бу ишни амалга ошириш имкониятлари мавжуд эмаслигини билдирди. Аммо ЕИ Россия гази қарамлигидан қутилиш режасини ишлаб чиқмоқда ва яқин бир неча йил ичида Россия гази қарамлигидан қутилиши эҳтимоли мавжуд.
Озарбайжоннинг биринчи президенти Аёз Муталибов вафот этди
Озарбайжоннинг биринчи президенти Аёз Муталибов Бакуда 84 ёшида вафот этди. Муталибов бир йилга етар-етмас президентлик қилди, 1992 йилда мухолифат томонидан ҳокимиятдан ағдарилган Муталибов Москвага қочди. У ватанига қайтишга рухсат берилгунича ўтган 20 йилни Россияда ўтказди.
Мутахассислиги инженер бўлган Муталибов 1977 йилдан турли амалларда ишлаб келган. 1989 йилда у Республика Вазирлар кенгаши раислигига тайинланган. 1990 йил январида Муталибов Озарбайжон Коммунистик партияси биринчяи котиби лавозимини эгаллади.
Муталибов мазкур лавозимга тайинланиши биланоқ бир неча ҳафтадан бери намойиш ўтказаётган мухолифатчиларни бостириш учун Бакуга Совет Армияси қўшинлари киритилган.
Намойишларни бостириш чоғида юзлаб норози ҳалок бўлган. Москва 1990 йилда этник арманларни ҳимоя қилиш учун Бакуга аскар киритганини айтиб келади. Бироқ Озарбайжон бу фикрга қўшилмайди.
1990 йилнинг майида Озарбайжон Олий Кенгаши Муталибовни мамлакат президенти сифатида сайлаган. 1991 йилда эса Муталибов Тоғли Қорабоғдаги урушда ҳарбий муваффақиятсизликларга учрагани, Хўжали шаҳрида озарбайжонлар оммавий равишда қирғин қилингани ортидан мухолифат босими остида истеъфо берди.
Тоғли Қорабоғдаги воқеаларни тергов қилган мустақил парламент комиссияси кейинроқ Муталибов истеъфосини бекор қилди. Комиссия “президент ҳар қандай вазиятда ҳам фожеанинг олдини олиб қололмасди”, деган хулосага келган. Парламентнинг бу қарорига Халқ фронти мухолифат ҳаракати қарши чиқди. Шундан сўнг бакуга мухолифатнинг қуролланган тарафдорлари кириб келди.
Муталибовнинг ўзи бу воқеаларни эсалар экан, Россия президенти Борис Ельцин уни қўллаб-қувватлашдан бош тортгани оқибатида унинг лавозимига қайтишига тўсқинликлар пайдо бўлгани ҳақида гапирган. Муталибов 1991 йилнинг 8 майида Россия ҳарбий самолётида Москвага қочган. Озарбайжонда Муталибовга нисбатан қатор жиноят ишлари очилган. У 2021 йилда сиёсатдан кетганини эълон қилиб, ватанига қайтди.
Роскомнадзор Германиянинг Bild нашри ҳамда журналист Александр Невзоров сайтларини блоклади
Роскомнадзор Россия ҳудудида Германиянинг Bild таблоиди сайтини ҳамда журналист Александр Невзоровнинг шахсий сайтини блоклаб қўйди. Тақиқланган сайтлар реестридаги янгиланишлар ҳақида “Роскомсвобода” лойиҳаси маълумот тарқатган.
Иккала сайт ҳам Бош прокуратуранинг 26 мартдаги қарорига кўра тўсилгани айтилмоқда.
Bild Германия ва Европадаги энг кўп нусхада чиқадиган газета саналади. У урушнинг илк кунларидан Россиянинг Украинага тажовузини кескин қоралаган. Таблоид Германияда яшаётган русзабон аудитория учун ўз сайтида рус тилида мақолалар бераётган эди.
22 март куни Россия Тергов қўмитаси ўққа тутилган Мариуполь туғруқхонасидаги қурбонлар суратларини эълон қилгани учун журналист Александр Невзоровга қарши жиноят иши очган. Мазкур иш Россия армияси ҳақида “фейк” тарқатишга доир модда бўйича қўзғатилган бўлиб, Невзоров 15 йилгача муддатга қамалиши мумкин.
Журналист “фейклар ҳақида”ги моддага кўра ўзига ва ҳамкасбларига жиноят ишлари очилишини “уларнинг бутунлай томи кетган”лиги билан изоҳлаган.
Туркманистон: Ота Бердимуҳамедов ўғил Бердимуҳамедовдан меҳнат таътили сўради
Туркманистоннинг собиқ президенти Гурбангули Бердимуҳамедов яқинда ўзидан давлат раҳбари лавозимини қабул қилиб олган ўғли Сардордан 2022 йил 1 апрелидан эътиборан меҳнат таътили беришни сўради.
“Арқадағ Гурбангули Бердимуҳамедов Туркманистон президентига шахсий илтимос билан мурожаат қилди”, дейилган “Туркманистон бугун” давлат агентлиги хабарида.
“Маълумингизким, мен 40 йилдан бери раҳбарлик лавозимларида ишлаб келмоқдаман, 25 йилдан бери сиёсат билан шуғулланаман. Катта иш ҳажми туфайли бу давр мобайнида тўлақонли дам олишга имкон бўлмади”, дея Бердимуҳамедовдан иқтибос келтирган агентлик.
Г. Бердимуҳамедов таътил чоғида бошлаб қўйган янги асарларини тугатишини, шунингдек шу йилга белгиланган Марказий Осиё ва Россия парламентлараро форуми, Марказий Осиё ва Россия аёллари диалоги ҳамда бошқа халқаро тадбирларга лозим даражада ҳозирлик кўришини билдирган.
Сардор Бердимуҳамедов илтимосни қаноатлантирган. Меҳнат таътилининг якунланиш санаси очиқланмаган.
Сардор Бердимуҳамедов 19 март куни Туркманистон президенти лавозимига киришган. Аввалроқ у халқаро кузатувчиларсиз ўтказилган сайловда 72,97 фоиз овоз олган эди.
Озодликнинг туркман хизмати сайловолди кампанияси ва овоз бериш жараёнида кўплаб қонунбузарликлар кузатилганини хабар қилган.
Чехия россиялик олигархларнинг бир неча юз миллион кроналик активларини музлатиб қўйди
Прага Украинадаги уруш туфайли санкция рўйхатига тушган россиялик олигархларнинг бир неча юз миллион кроналик мол-мулки ва ҳисобрақамларини музлатиб қўйди. Бу ҳақда бош вазир Пётр Фиала Чехия телевидениеси ёйинида билдирди.
Фиалага кўра, санкция рўйхатидаги россиялик тадбиркорларга тегишли бирор-бир ширкатга зарба бераркан, давлат ходимларни иш билан таъминлаши керак. У санкция талабларини бажариш учун Чехия ўз қонунчилигига ўзгартишлар киритиши керак бўлиши мумкинлигини истисно қилмаган. Бош вазир россиялик олигархларга тегишли корхоналарни “национализация қилиш” тўғрисида ҳеч қанақа гап йўқлигини урғулаган.
Чехияда Россияга қарши санкцияларга риоя қилиниши учун Молиявий-таҳлилий бюро жавоб беради. Аввалроқ бюро чекловларни айланиб ўтиш билан боғлиқ бир неча ҳолатни ўрганиш билан шуғулланаётганини билдирган. Бюро маълумотига кўра, айрим тадбиркорлар ўз ҳисобрақамларидаги бир неча ўн миллион кронни олиб чиқиб кетишга уринишган. Айни пайтда бу иш полиция томонидан тергов қилинмоқда. Тадбиркорларнинг исмлари эса очиқланаётгани йўқ.
Роскомнадзор Россия ОАВдан Зеленский билан интервьюни ёйинламасликни талаб қилмоқда
Роскомнадзор Россия оммавий ахборот воситаларидан Украина президенти Владимир Зеленский билан интервьюни ёйинламасликни талаб қилди. Зеленский билан суҳбатда иштирок этган журналистларга қарши текширув бошланган.
“Роскомнадзор Россия ОАВни мазкур интервьюни чоп қилишдан воз кечиш зарурати ҳақида огоҳлантиради. Интервью олган оммавий ахборот воситаларига нисбатан уларнинг жавобгарлик даражасини аниқлаш ва жавоб чораларини кўриш учун текширув бошланган”, дея қайд этилган Роскомнадзор хабарномасида.
Россия Бош прокуратураси эса Зеленскийнинг россиялик журналистлар томонидан чоп этилган интервьюсидаги баёнотларга ҳуқуқий баҳо берилишини билдирган.
27 март куни Украина президенти Владимир Зеленский россиялик қатор журналистларга интервью берган, улар орасида “Медуза”, “Медиазона”, “Коммерсантъ” нашрлари ҳамда “Дождь” телеканали вакиллари бор эди.
Ўз интервьюсида Зеленский, агар Россия билан музокараларда гап “демилитаризация” ва “денацификация” ҳақида кетадиган бўлса, Киев Москва билан музокаралар столи ўтирмаслигини билдирган.
“Булар мен учун мутлақа тушунарсиз нарсалардир”, деган Украина президенти.