«Даңгыраглаан соонда — күүсет»
«Дээрги-Чаяакчының мурнунга аашкынган чүвеңни күүсет» (МФ. 5:33).
КАНЧААР ХАРЫЫЛААР СИЛЕР?
Бурганга бараалгаар дээн даңгыраанга дүүштүр чурттаары кайы хире чугула?
Өгленишкениниң даңгыраанга дүүштүр чурттаары кайы хире чугула?
Тускай долу бараалгалга хамаарышкан даңгыраанга дүүштүр чурттаары кайы хире чугула?
1. а) Иеффай биле Аннаның чүзү дөмей турган? (Статьяның эгезинде чурукту көрүңер.) б) Бо статьяга кандыг айтырыгларны сайгарар бис?
ИЕФФАЙ эрес-дидим дайынчы болгаш Бурганның чонунуң баштыңчызы чораан. Анна ашаанга дыңнангыр, бөдүүн херээжен чораан. Оларның кайызы-даа Иеговага бараалгап турган. Оон ыңай оларның аразында дөмей чүүл — оларның кайызы-даа Бурганга даңгырак бергеш, ону күүсеткен. Иеговага даңгырак бээр деп шиитпирлээн улуска Иеффай биле Анна кайгамчык үлегерни арттырган. Даңгырак деп чүл ол? Бурганга берип турар даңгырактарывыска кайы хире шыңгыы хамаарылгалыг болур ужурлуг бис? Иеффай биле Аннаның дугайында тоожулардан кандыг кичээлдерни шиңгээдип алыр бис?
2, 3. а) Даңгырак деп чүл ол? б) Бурганга берип турар даңгырактарга хамаарыштыр Библияда чүү дээнил?
2 Библияныы-биле алырга, Бурганга даңгырак берип турар кижи бир-ле чүве кылырын, өргүл бээрин, тускай бараалгалды эгелээрин азы бир-ле чүведен ойталаарын аазап турар (Э. д. 14:22, 23; Евр. 6:16, 17). Даңгыракты кижи күзелдии-биле, эки туразы-биле бээр. Иегова даңгыракты шыңгыы аазаашкын кылдыр хүлээп турар, ынчангаш ону күүсетпейн барып болбас. Бурганга берип турар даңгырактарывыска кайы хире шыңгыы хамаарылгалыг болурувустуң дугайында Библияда чүү дээнил?
3 Моисейниң хоойлузунда мынча дээн: «Бир эвес кандыг-бир эр кижи Дээрги-Чаяакчыга даңгырак берген азы. аазаан болза, ол кижи сөглээн сөзүнге ээ бооп, шупту чүвени чугаалаан аайы-биле күүседир ужурлуг» (Сан. 30:3). Сөөлзүредир Соломон: «Бурганга даңгырак бергеш, ону саадатпайн күүсет, чүге дээрге Бурган мугулайларга таарзынмас; даңгыраглаан соонда — күүсет» — деп бижээн (Эккл. 5:3). Даңгыракка хамаарылга шыңгыы болур ужурлуг деп, Иисус бадыткаан: «Бурунгу өгбелеривиске: „Аксы-даңгырааңны сагып чор. Дээрги-Чаяакчының мурнунга аашкынган чүвеңни күүсет“ — деп чугаалаанын дыңнаан силер» (Мф. 5:33).
4. а) Бурганга даңгырак бээри кайы хире шыңгыы бооп турарыл? б) Иеффай биле Аннага хамаарыштыр кандыг айтырыгларны сайгарып көөр бис?
4 Иеговага берген аазаашкыннарывыска шыңгыы хамаарылгалыг болур ужурлуг бис. Чүге дээрге ол чүүл Иегова-биле хамаарылгавысче дорт салдар чедирип турар. «Дээрги-Чаяакчының даанче кым үнүп болурул, Ооң ыдыктыг черинге кым туруп болурул? . Хей черге даңгырак бербээн, меге аазаашкын кылбаан кижи ол-дур» (Ыд. ыр. 23:3, 4). Ынчалза-даа Иеффай биле Анна кандыг даңгырактар бергенил? Ону күүседири оларга берге турган бе?
ОЛАР ДАҢГЫРААН КҮҮСЕТКЕН
5. Иеффай кандыг даңгырак бергенил, оон чүү болганыл?
5 Иеффай Бурганның чонун дарлап турган аммоннар-биле дайылдажырының мурнунда Иеговага берген аазаашкынын күүсеткен (Башт. 10:7—9). Тиилелге чедип аар дээш, Иеффай Бурганга: «Бир эвес Сен аммоннарны мээң холумче киирип бериптер болзуңза, аммоннардан амыр-менди дедир чанып кел чыдырымда, бажыңымның хаалгазындан меңээ уткуй баштай үнүп келген амытанны Сеңээ бүрүн өрттедир өргүл кылдыр салыр мен» — деп даңгыраглаан. Оон чүү болган? Аммоннарны тиилээн соонда, Иеффай чанып кээрге, аңаа уткуй ооң ынак уруу үнүп келген. Иеффай ол уруун Иеговага бээр ужурлуг турган (Башт. 11:30—34). Ол чүү дээни ол?
6. а) Иеффай биле ооң уруунга Бурганга берген даңгыракты күүседири белен турган бе? б) Ыдыктыг хоойлуну катаптааны 23:21, 23 биле Ырлар 14:4 даңгырактарга шыңгыы хамаарылгалыг болурувусту канчаар көргүзүп турарыл?
6 Иеффайның берген даңгыраа күүсеттинер кылдыр, ооң уруу ыдыктыг өргээ-майгынның мурнунга Иеговага үргүлчү бараалгаар ужурлуг турган. Иеффай даңгыракты эки боданмайн, берген деп чугаалап болур бе? Чок. Чүге дизе аңаа уткуй ооң уруу үнүп кээп болур деп, ол билип турган. Ындыг-даа болза, уруу үнүп кээрге, даңгыракты күүседири оларның кайызынга-даа берге болур деп, олар билип каан. Уруун көрүп кааш, ол качыгдалдан хевин ора тырткаш: «Мени хай-халапче чыгадыптың!» — деп алгырып үнген. Ооң уруу өгленмес болганындан ыглап турган. Чүге? Халаптыг чүве, Иеффайның оглу чок турган, а ооң чаңгыс уруу өгленгеш, ооң ады биле өнчүзүн уйнуктарынга дамчыдар аргазын чидирипкен. Ынчалзажок оон-даа чугула чүүл турган. Иеффай: «Мен Дээрги-Чаяакчыга аксы-сөзүм берген болгай мен, ам оон ойталап шыдавас мен!» — деп чугаалаан (Башт. 11:35—39). Уруу аңаа мынча деп харыылаан: «Аңаа аазааның ёзугаар мээң-биле кыл» (Башт. 11:35—39). Чеже-даа берге болза, Бурганга бердинген ол ийи кижиниң сагыжынга Иеговага даңгыраан үрээр деп бодал бичии-даа кирбээн (Ыдыктыг хоойлуну катаптааны 23:21, 23; Ырлар 14:4 номчувут.)
7. а) Анна Бурганга чүнү аазаан база ол чүге ындыг аазаашкынны бергенил? Бурган ооң мөргүлүнге канчаар харыылааныл? б) Аннаның даңгыраа Самуилдиң чуртталгазынга кандыг салдарлыг турган? (Немелде тайылбырны көрүңер.)
7 Оон ыңай Иеговага берген даңгыраан күүсеткен кижи — Анна-дыр. Анна ажы-төлдүг бооп шыдавас турганы дээш база Феннананың ону хомудадып турганы дээш аажок муңгарап турган (1 Хаан. 1:4—7, 10, 16). Анна Бурганга сагыш-сеткилин тө каап бергеш, даңгырак берген: «Аг-шериглиг Дээрги-Чаяакчы! Бир эвес Сен чаржынчыг чалчаң менче ээ көрнүп кээр болзуңза, мени утпайн, меңээ эр хиндиктиг төлден хайырлаар болзуңза, ону мен Дээрги-Чаяакчыга бүгү назынында бериптер мен, ооң бажының дүгүнге бистиг чүве дегбес» (1 Хаан. 1:11)*. Бурган Аннаның мөргүлүнге харыылаан. Ол дун оглун божуп алгаш, дыка өөрээн! Анна Бурганга берген даңгыраан утпаан: «Ону Дээрги-Чаяакчыдан дилеп алган мен» — деп, ол чугаалаан (1 Хаан. 1:20).
8. а) Аннага даңгыраан күүседири белен турган бе? б) 60 дугаар ырда бижээн Давидтиң сөстери Аннаның шын хөөнүн канчаар илередип турар?
8 Бичии Самуилди, үш хире харлыында, эмигден үндүргениниң соонда, Анна Бурганга берген даңгыраан күүсеткен. Ол бичии-даа өскээр боданмайн, Силомда ыдыктыг өргээ-майгында бараалгап турган дээди бараалгакчы Илийге Самуилди апарып бергеш: «Бо төлүмнү дээш мөргүп дилеп турган мен. Дээрги-Чаяакчы мээң дилээмни хандырып бергени ол-дур. Ам мен ону Дээрги-Чаяакчыга тураскаадырым ол-дур. Дээрги-Чаяакчыга ол бүгү назынында бараан болзун» — дээн (1 Хаан. 1:24—28). «Бичии Самуил Дээрги-Чаяакчының хайгааралының адаанда өзүп орган» деп Библияда бижээн (1 Хаан. 2:21). Ынчалза-даа Аннага чамдыкта дыка берге турган. Ол ынак оглунуң чанынга хүннүң-не туруп шыдавас турган. Бодап көрүңер даан, ол оглун кайы хире куспактаксап, чассыдыксап, кады ойнаксап, кижизидиксеп, ооң эр кижи бооп өзүп кээрин көрүксеп, чылыг сактыышкыннарын сеткилинге шыгжап арттырып алыксап турган-дыр! Ындыг-даа болза, Анна Бурганга ындыг даңгырак бергени дээш хараадавайн турган. Ооң чүрээ Иегованың ачызында өөрүп турган (1 Хаан. 2:1, 2; Ырлар 60:2, 6, 9 номчувут).
Иеговага берген даңгырактарыңарны күүседип турар силер бе?
9. Бо статьяга кандыг айтырыгларны сайгарар бис?
9 Бурганга берген даңгырактарывыска шыңгыы хамаарылгалыг болур ужурлуг бис деп көрдүвүс. Аңаа хамаарыштыр дараазында айтырыгларны сайгарыптаалыңар: христианнар болганывыста, Бурганга кандыг даңгырактарны берип болур бис? Даңгырактарывысты күүседир дээш кандыг күжениишкиннерни үндүрер ужурлуг бис?
БУРГАНГА БАРААЛГААР ДЭЭН ДАҢГЫРАК
Бурганга бараалгаар дээн даңгырак (10-гу абзацты көрүңер.)
10. Христиан кижи кандыг эң-не чугула даңгырак берип болурул база ол чүнү илередип турар?
10 Чуртталгазын Иеговага бараалгадыр аазаашкын — христиан кижиниң эң-не чугула даңгыраа-дыр. Чүге ынча деп болурул? Хууда мөргүлүнге ол, чүү-даа боор болза, Иеговага кезээ-мөңгеде бараалгаар деп даңгыраглап турар. Иисустуң чугаалааны дег, ындыг кижи бодундан ойталааш, Иегованың күзел-соруун күүседири ооң чуртталгазынга бирги черни ээлээр деп аазап турар (Мф. 16:24). Оон эгелээш, ол Иеговага хамааржыр апаар (Рим. 14:8). Чуртталгазын бараалгадыр деп даңгырак берип турар кижи бүрүзү, ыр күүседикчизи дег, аңаа шыңгыы хамаарылгалыг болур ужурлуг. Ол: «Дээрги-Чаяакчының меңээ хайырлаан бүгү буяны дээш, чүнүң-биле харыылаар мен? Дээрги-Чаяакчыга берген даңгырактарымны Ооң бүгү чонунуң мурнунга күүседир мен» — дээн (Ыд. ыр. 115:3, 5).
11. Сугга суктурган хүнүңерниң дугайында чугаалап көрүңерем.
11 Иеговага чуртталгаңарны бараалгаткаш, сугга суктуруп алган болзуңарза, кончуг эки-дир! Сугга суктурган хүнүңерде өскелерниң мурнунга силерден: «Бодуңну Бурганга бараалгаткаш, сугга суктуруп алганың-биле Иегованың Херечизи апарганыңны болгаш Бурганның сүлдезинге башкарткан организациязынга катчып турарыңны билип тур сен бе?» — деп айтырган. «Ийе» деп харыылааныңар-биле Бурганга бодуңарны бүрүнү-биле бараалгаткаш, Ооң бараалгакчызы болур дээш, сугга суктурарынга белениңерни ажыы-биле көргүскен силер. Иегованы дыка-ла өөрткен силер!
12. а) Бодувуска кандыг айтырыгларны салып болур бис? б) Пётрнуң сөстеринден алырга, кандыг шынарларны сайзырадыр болзувусса эки?
12 Ынчалзажок сугга суктурары — оруктуң чүгле эгези-дир. Сугга суктургаш, Бурганга чуртталгавысты бараалгатканывыска дүүштүр чурттаарын кызып, Аңаа шынчы бараалгаарын уламчылап чоруур бис. Ынчангаш мындыг айтырыгларны бодувуска салыр болзувусса эки: сугга суктурганымның соонда бараалгалымга кандыг чедиишкиннерни кылган мен? Иеговага, ооң мурнунда ышкаш, ак-сеткилдии-биле бараалгап турар мен бе? (Кол. 3:23). Үргүлчү мөргүп, хүннүң-не Библияны номчуп, чыыштарже доктаамал барып, шыдаар шаам-биле суртаал ажылынга киржип турар мен бе? Азы бо чүүлдерниң кайы-бирээзинге чүткүлүм өже берген бе? Пётр элчин Бурганга бараалгалга чүткүлдүг артар дизе, бүзүрелге билигни, туруштуг чорукту болгаш Бурганга бердинген чорукту немээрин чугаалаан. (2 Пётр 1:5—8 номчувут.)
13. Иеговага чуртталгазын бараалгаткаш, сугга суктуруп алган кижи чүнү миннир ужурлуг?
13 Бурганга чуртталгавысты бараалгатканывыстың даңгыраан өскертири болдунмас. Бир эвес кижи Иеговага бараалгаарындан шылап калган азы христиан чуртталгадан ооң хөңнү кала берген болза, ол «Иеговага бодумну бараалгатпаан мен, ынчангаш сугга суктурганым күш чок» деп чугаалап шыдавас*. Чүге дизе ындыг кижи сугга суктуруп тургаш, Бурганга бодун бараалгатканын ажыы-биле көргүскен болгай. Бир эвес ол аар бачыт кылыптар болза, Бурганның болгаш чыыштың мурнунга ол харыы тудар апаар (Рим. 14:12). Баштайгы ынакшылыңарны кажан-даа чидирбеңер. Иисус силерниң дугайыңарда мынчаар чугаалап болур кылдыр чурттаңар: «Ажыл-херээңерни, ынакшылыңарны болгаш бүзүрелиңерни, бараан болуушкунуңарны база үр шыдажып келгениңерни билир мен. Эгезинде кылып турганыңардан хөйнү кылып турарыңарны-даа билир мен» (Ажыд. 2:4, 19). Бурганга чуртталгаңарны бараалгатканыңарга дүүштүр моон-даа соңгаар чурттаарын кызып, Иегованың чүрээн өөртүңер.
ӨГЛЕНИШКЕНИНИҢ ДАҢГЫРАА
Өгленишкениниң даңгыраа (14-кү абзацты көрүңер.)
14. Чугула даңгырактарның ийи дугаары кандыгыл база чүге ынча деп болурул?
14 Ийи дугаар чугула даңгырак — өгленишкениниң даңгыраа-дыр. Чүге? Чүге дээрге өг-бүле тургузуу ыдыктыг. Өгленип турар улус Бурганның болгаш кижилерниң мурнунга өгленишкениниң даңгыраан берип турар. Олар бот-боттарынга ынак боорун, хүндүлежирин база бүгү өг-бүле чуртталгазының дургузунда кады чурттаарын болгаш бот-боттары дээш сагыш човаарын аазап турар. Өгленишкен улус мындыг сөстерни чугаалавас-даа болза, олар дөмей-ле Бурганга даңгырак берип турар. Оон оларны ашак-кадай апарган деп чарлаар. Бурганның күзел-бодалы-биле алырга, оларның эвилели өлүрүнге чедир уламчылаар ужурлуг (Э. д. 2:24; 1 Кор. 7:39). Иисустуң чугаалааны дег, «Бурганның каттыштырган чүвезин кижи» — ашаа-даа, кадайы-даа азы өскелер-даа — чарып болбас ужурлуг. Ынчангаш өгленир деп турар улус чарлып болбас деп медерээр ужурлуг (Мк. 10:9).
15. Бо делегейде өг-бүле тургузуунга нептерээн шыңгыы эвес хамаарылганы христианнар чүге өттүнмейн турарыл?
15 Четпес-дудуу чок өг-бүлелер каяа-ла турар ийик. Өг-бүле — ийи бачыттыг кижиниң эвилели болгай. Ынчангаш Библияда «өгленип алган улус амыдыралынга түрегдел көөр» деп бижээн (1 Кор. 7:28). Харааданчыг чүүл, бо делегейде кижилерниң хөй кезии өг-бүле тургузуунга шыңгыы эвес хамаарылгалыг. Бергелер тургустунуп кээрге, ындыг улус оларны шиитпирлээриниң орнунга, анаа чарлып турар. Ынчалза-даа христианнарга ындыг чүүл таарымча чок. Өгленишкениниң даңгыраан үрээри — Бурганны мегелээри-биле дөмей, а Ол мегечилерге хөңнү чок (Лев. 19:12; У. ч. 6:16—19). Павел элчин: «Кадайың-биле чурттап турар болзуңза, канчаарыл? Чарылган херээң чок» — деп бижээн (1 Кор. 7:27). Павел чүге ынча дээнил? Иегова чара бадыланчыр чорукка хөңнү чок деп, ол билир турган (Мал. 2:13—16).
16. Библияда чара бадыланчырының болгаш аңгыланып чурттаарының дугайында чүнү бижээнил?
16 Иисустуң чугаалааны дег, өгленишкениниң даңгыраан күш чок болдурар чаңгыс чылдагаан — ашааның азы кадайының өскерликчи чоруу-дур (буруу чок тала өршээрин күзевээн болза) (Мф. 19:9; Евр. 13:4). А Библияда аңгыланып чурттап болурунуң дугайында бижээн бе? Ийе. (1 Коринфичилерге 7:10, 11 номчувут.) Ынчалза-даа ынчаар чурттап болурунуң чылдагааннарын ында тодаратпаан. Ындыг-даа болза чамдык христианнар аңгыланып чурттаарының чылдагааннары оларда бар деп шиитпирлээн. Чижээ, каржы-хажагай азы ойталакчы ашааның (кадайының) талазындан каржы-дошкун аажылаашкын, чок болза Бурган-биле харылзаазынга аар хора чедирип болур айыыл*.
17. Христианнар өг-бүлезин канчаар быжыглап ап болур?
17 Бергелерге таварышкан ашак-кадай улус удуртукчулардан сүме дилеп болур. Ындыг таварылгада удуртукчулар «Ёзулуг ынакшыл деп чүл ол?» (орус дылда) деп фильмни болгаш «Силерниң өг-бүлеңер аас-кежиктиг бооп болур» деп брошюраны кажан кады сайгарганын олардан айтырар болза эки. Чүге дизе ында библейжи дүрүмнер дыка хөй улуска өг-бүлезин быжыглаарынга дузалаан. Бир өг-бүле улус мынча дээн: «Ол брошюраны өөренип эгелээривиске, аравыста харылзаавыс кажангызындан-даа артык быжыг апарган». А ашаа-биле 22 чыл кады чурттап келгеш, чарлырының кырынга турган бир угбавыс: «Кайывыс-даа сугга суктурган христианнар турган бис, ынчалза-даа аажы-чаңнарывыс көңгүс ийи аңгы турган. Бо фильм биске аажок дузалаан. Ам бот-боттарывысты дыка билчир апарган бис» — деп үлешкен. Өглүг болзуңарза, Иегованың дүрүмнерин үргүлчү херекке ап чоруңар. Ол чүүл өг-бүлеңерге аас-кежиктиг болурунга болгаш өгленишкениңерниң даңгыраанга дүүштүр чурттаарынга дузалаар.
ТУСКАЙ ДОЛУ БАРААЛГАКЧЫЛАРНЫҢ ДАҢГЫРАА
18, 19. а) Хөй христиан ада-иелер ажы-төлүн чүүже деткип турарыл? б) Тускай долу бараалгакчылар чүнү кылып турарыл?
18 Иеффай биле Аннаның оон ыңай чүзү дөмей турганыл? Оларның берген даңгырааның ужундан Иеффайның уруу-даа, Аннаның оглу-даа ыдыктыг өргээ-майгынның мурнунга бүгү назынында бараалгаар турган. Ол бараалгал оларга ёзулуг аас-кежикти эккелген. Бөгүн база хөй ада-иелер ажы-төлүн долу бараалгалды эгелээринче деткип турар. Ынчаар кылып турар ада-иелер-даа, ажы-төл-даа макталга төлептиг (Башт. 11:40; Ыд. ыр. 109:3).
Тускай долу бараалгакчыларның даңгыраа (19-ку абзацты көрүңер.)
19 Амгы үеде бүдүн делегейде Иегованың Херечилериниң тускай долу бараалгакчыларының орденинде 67000 хире кижи бараалгап турар. Олар Вефилде ажылдап, тудуг черлеринде дузалажып, эргий кезиир ажылга киржип, бараалгал школаларында башкылап, тускай эгелекчилер азы миссионерлер кылдыр, чок болза Шуулганнар залдарының азы библейжи школаларның ажылдакчылары бооп бараалгап чоруур. Олар шупту дыңнангырының болгаш бөдүүн чурттаарының даңгыраан берген: олар Иегованың организациязынга кандыг-даа даалганы күзелдии-биле күүседирин болгаш чөпшээрел чокка өске ажылга ажылдавазын чөпшээрешкен. Оларны чүге тускай долу бараалгакчылар деп адааныл? Чүге дээрге оларга тускай бараалгалды дагзып каан. Олар тускай долу бараалгап тургаш, даңгыраан биче сеткилдии-биле күүседириниң кайы хире чугулазын эки билип турар.
20. «Хүннүң-не» чүнү канчаар ужурлуг бис база чүге?
20 Кырында чугаалаан үш даңгырактың кайызын Бурганга берген силер? Оларга шыңгыы хамаарылгалыг болур ужурлуг дээрзин эки миннип турар боор силер (У. ч. 20:25). Иеговага даңгырак бергеш, ону күүсетпес кижи Ооң-биле хамаарылгазын үреп алыр (Эккл. 5:5). Ынчангаш «Сээң адыңны кезээ мөңгеде алдаржыдып, даңгыраглаан сөстеримни хүннүң-не күүседир мен» деп чугаалаан ыр күүседикчизин өттүнээлиңер! (Ыд. ыр. 60:9).
Анна, оол төрүттүнер болза, ол бүгү назынында назорей, азы Иеговага ыдыктыг бараалгаарынга тускай аңгылаттынган кижи, бооп артар деп аазаан (Сан. 6:2, 5, 8).
Кижиниң сугга суктурар негелделерге дүгжүп турарынга шынзыгар дээш, удуртукчуларның кайы хире хөй күш үндүрүп турарын херекке алыр болза, чүгле аажок ховар таварылгаларда улустуң сугга суктурганы күш чок деп санаттынып болур.
«Бурганның ынакшылының ачызында бодуңарны кадагалаңар» деп (орус дылда) номну көрүңер, 219—221 арыннар.